احمد آباد (سپورٹس ڈیسک ) بھارت میں ہونے والے ورلڈکپ کے فائنل میں بی سی سی آئی کی سب تدبیریں الٹی پڑ گئیں ۔ بھارت کو شکست دیکر آسٹریلیا چھٹی بار کرکٹ کا عالمی چیمپئن بن گیا۔تفصیلات کے مطابق احمد آباد کے نریندر مودی کرکٹ سٹیڈیم میں کھیلے جانے والے آئی سی سی ورلڈ کپ 2023ء کے فائنل میں بھارت کا سپن وکٹ بنانا اپنے گلے ہی پڑ گیا۔ ٹاس جیت کر پہلے بولنگ کرنے کا آسٹریلوی کپتان پیٹ کمنز کا فیصلہ درست ثابت ہوا ۔ پورے ٹورنامنٹ میں ناقابل شکست ٹیم کی فائنل میں بیٹنگ چلی نہ بولنگ فاتح ٹیم نے بھارتی سورمائوں کو بہترین بائولنگ سے 240 رنز تل محدود رکھا ۔ شکست پر بھارتی کھلاڑی روتے رہے ، ایک لاکھ 30 ہزار تماشائیوں میں ہو کا عالم چھا گیا ۔ 241 رنز کا ہدف آسٹریلیا نے 4 وکٹوں کے نقصان پر بنالیا۔آسٹریلیا کرکٹ ورلڈ کپ کی تاریخ میں سب سے زیادہ چھ بار چیمپئن بننے والی ٹیم بن گئی ہے جو اس سے قبل 1987، 1999، 2003، 2007 اور 2015 میں بھی ٹائٹل اپنے نام کرچکی ہے ۔ہدف کے تعاقب میں آسٹریلیا کو ابتدا میں مشکلات کا سامنا رہا اور صرف 47 رنز پر تین کھلاڑی آؤٹ ہوچکے تھے تاہم ٹریوس ہیڈ اور مارنوس لبوشین ذمہ دارانہ بیٹنگ کا مظاہرہ کرتے ہوئے آسٹریلیا کو میچ میں واپس لے آئے ۔ٹریوس ہیڈ نے 95 گیندوں پر شاندار سنچری سکور کی جبکہ مارنوس لبوشین نے نصف سنچری بنائی۔ ٹورنامنٹ میں اب تک ناقابل شکست رہنے والی بھارتی ٹیم فائنل میں آسٹریلیا کے خلاف پہلے کھیلتے ہوئے 240 رنز بناسکی اور اس کی پوری ٹیم پویلین لوٹ گئی۔ ٹیم کے اوپنر شبمن گل محض 4 رنز بناکر پویلین لوٹ گئے ۔ کپتان روہت شرما نے 47 جبکہ ویرات کوہلی نے 54 رنز کی اننگز کھیلی۔مڈل آرڈر بیٹر کے ایل راہول نے 67 رنز کی مزاحمتی اننگز کھیلی۔ دیگر کھلاڑیوں میں شریاس ایر 4، رویندرا جڈیجا 9، محمد شامی 6، جسپریت بمراہ ایک رنز کے مہمان ثابت ہوئے ۔آسٹریلیا کی جانب سے مچل اسٹارک نے 3، پیٹ کمنز اور جوش ہیزل ووڈ نے دو دو جب کہ ایڈم زمپا اور گلین میکسویل نے ایک ایک وکٹ حاصل کی۔ٹورنامنٹ میں 765 رنز بنانے والے بھارت کے ویرات کوہلی کو مین آف دی میچ ٹورنامنٹ قراردیا گیا ۔