آئی ایم ایف نے این ایف سی ایوارڈ میں تبدیلی کی شرائط نہیں لگائیں:وزیر خزانہ

کراچی(این این آئی) وفاقی وزیر خزانہ محمد اورنگزیب نے کہا ہے کہ آئی ایم ایف نے این ایف سی ایوارڈ میں تبدیلی کی شرائط نہیں لگائیں۔میڈیا سے گفتگو کرتے ہوئے محمد اورنگزیب نے کہا کہ اسلامی مالیاتی نظام پر منتقلی کے سفر میں سب کو مل کر چلنا ہے ، شریعہ اصولوں پر مرتب پراڈکٹ سے صارف کا اعتماد حاصل کرنا ہے ، حکومت کو سکوک کے ذریعے سود سے پاک قرض مل سکتا ہے ۔وزیر خزانہ نے کہا دنیا میں ویلیو فنانشل خدمات کی مانگ بڑھ رہی ہے ، ایس ای سی پی ریگولیٹری ماحول فراہم کر رہا ہے ، ایس ای سی پی کی توجہ شعبے کی صلاحیت بڑھانے پربھی ہے ۔محمد اورنگزیب نے کہا کہ معاشی چیلنجز درپیش تھے ، انہیں حل کیا ہے ، ہماری معاشی سمت درست ہے ۔ وزیر خزانہ نے کہا این ایف سی میں تبدیلی کے لئے صوبوں کے ساتھ مشاورت ضروری ہے ، اگر ایک صوبے میں آبادی یا فارمولا کے اعدادوشمار تبدیل ہو جائیں تو نیا معاہدہ کرنا پڑے گا۔وزیر خزانہ نے کہا کہ اس وقت کی حکومت کو این ایف سی میں تبدیلی کرنا چاہئے تھی، وزارت خزانہ کے پاس تو جتنے فنڈز ہیں، ان میں سے ہی تقسیم ہوں گے ۔وزیر خزانہ نے اسلامی کیپٹل مارکیٹس کانفرنس وایکسپوسے ورچوئل خطاب کرتے ہوئے کہا اسلامی مالیات اوراسلامی کیپٹل مارکیٹس کے مکمل استعداد سے فائدہ اٹھانے کیلئے مل کرکام کرنے کی ضرورت ہے ۔