بیرونی سازشوں سے بچنا ہے تو اکٹھے ہونا ہوگا: سعد رفیق
لاہور (سٹاف رپورٹر؍نمائندہ خصوصی سے ) مسلم لیگ( ن)کے رہنما خواجہ سعد رفیق نے کہا ہے کہ سیاسی جماعتیں گراس روٹ لیول پر سیاست کیوں نہیں کرتیں، آج عدلیہ کے جج متنازع ہو گئے ، ریاستی اداروں کو بھی سوچنا ہو گا، پاکستان کے خلاف بیرونی سازشوں سے بچنا ہے تو ہمیں اکٹھا ہونا پڑے گا۔سابق وزیرِ اعلیٰ پنجاب غلام حیدر وائیں کی یاد میں تقریب سے خطاب کرتے ہوئے خواجہ سعد رفیق نے کہا میں نواز شریف کی گڈ بک میں نہیں تھا لیکن وائیں صاحب کا پیارا تھا،میں ان خوش قسمتوں میں سے ہوں جسے وائیں صاحب سے ڈانٹ نہیں پڑی،غلام حیدر وائیں نے سیاسی کیریئر میں میرا کافی ساتھ دیا، ضیاء الحق اس وقت صدرِ پاکستان تھے ، میں اس آمریت کے خلاف تھا، وائیں صاحب کو جن لوگوں نے مارا، وہ ہارڈ کور کریمنلز تھے ۔ خواجہ سعد رفیق نے کہا اسٹیبلشمنٹ سیاسی جماعتوں کو بناتی ہے جس سے کچھ مشکلات پیدا ہوتی ہیں، کوئی سیاسی جماعت اپنا منشور پڑھنے کی بھی روادار نہیں، غلطی چند لوگ کرتے ہیں، سزا ساری جماعت کو ملتی ہے ، یہ جو پارٹی رگڑا کھا رہی ہے ، یہ لوگ بھی اسی وجہ سے اس موڑ پر کھڑے ہیں۔سعد رفیق نے مزید کہا کہ لوگ سمجھتے ہیں کہ بانی پی ٹی آئی، مسلم لیگ( ن) اور اسٹبلشمنٹ کی لڑائی بڑی ہے ، حقیقت یہ ہے کہ بلوچستان کا مسئلہ سب سے اہم مسئلہ ہے ، آئینِ پاکستان کو تسلیم کرنے والی جماعتوں کو ایک ساتھ بیٹھنا ہو گا، آئینِ پاکستان کو ماننے والے آج دست و گریباں ہیں۔
