جارج ڈبلیو بش کا ڈونلڈ ٹرمپ کی توثیق سے گریز

واشنگٹن(این این آئی،نیٹ نیوز) امریکہ کے سابق ری پبلکن صدر جارج ڈبلیو بش نے صدارتی انتخابات کیلئے سابق امریکی صدر ڈونلڈ ٹرمپ کی توثیق سے گریز کیا ہے ۔غیر ملکی خبر رساں ادارے کے مطابق سابق امریکی صدر کے ترجمان کا کہنا ہے کہ جارج ڈبلیوبش اورنہ ہی ان کی اہلیہ ظاہرکریں گے کہ نومبر میں کس کو ووٹ دینا ہے ۔گزشتہ ہفتے بش دورکے نائب صدر ڈک چینی نے کملا ہیرس کی حمایت کرکے سیاسی حلقوں میں ہلچل مچادی تھی۔ امریکہ میں رواں سال 5 نومبر کو صدارتی الیکشن کیلئے ووٹنگ ہونی ہے جہاں امریکی نائب صدر کملا ہیرس ڈیموکریٹ امیدوار ہیں جبکہ ری پبلکن پارٹی کی طرف سے سابق صدر ڈونلڈ ٹرمپ الیکشن لڑیں گے ۔