سعودیہ: دہشت گرد تنظیموں کی سہولت کاری پر 2 افراد کا سر قلم

ریاض (نیٹ نیوز) سعودی عرب میں دہشت گرد تنظیموں کے ساتھ مل کر ملکی سلامتی کو نقصان پہنچانے کی سازش پر دو افراد کا سر قلم کر دیا گیا۔خلیج ٹائمز کے مطابق سعودی وزارت داخلہ کی جانب سے جاری بیان کہا گیا ہے کہ جو بھی ملک کی سلامتی کو نقصان پہنچانے یا اس کے اتحاد کو خطرے میں ڈالنے کی کوشش کرے گا اسے ختم کر دیا جائے گا، جن دو افراد کو سزائے موت دی گئی ان پر ملک سے غداری، دہشت گرد تنظیموں کے ساتھ تعاون اور قومی سلامتی کو ممکن بنانے والوں کے خلاف سازش کرنے کا الزام تھا۔بیان میں مزید کہا گیا ہے کہ پبلک پراسیکیوشن کی جانب سے ان کارروائیوں کے ارتکاب کا الزام عائد کیا گیا تھا اور شواہد کی روشنی میں مجاز عدالت نے موت کی سزا سنائی تھی۔بعد ازاں ان مجرموں نے اعلیٰ عدالت سے رجوع کیا تھا وہاں بھی سزا برقرار رکھی گئی تھی۔ دونوں شہریوں کو تمام تر قانونی امداد فراہم کی گئی تھی۔یاد رہے کہ سعودی عرب میں رواں برس 100سے زائد افراد کو سزائے موت سنائی گئی۔