پی ٹی آئی بات کرنا چاہتی تو ہم تیار: عرفان صدیقی

اسلام آباد(آن لائن) مسلم لیگ ن کے رہنما سینیٹر عرفان صدیقی کا کہنا ہے کہ اگر پی ٹی آئی بات کرنا چاہتی ہے تو سو بسم اﷲ، ہم تیار ہیں۔سینٹ میں اظہار خیال اورپارلیمنٹ ہائوس میں میڈیا سے گفتگو کرتے ہوئے عرفان صدیقی نے کہا کہ اگر وہ سمجھتے ہیں کہ چور ڈاکوؤں سے ہاتھ ملایا جا سکتا ہے ، بات ہو سکتی ہے تو ضرور کریں، مگر انہیں اپنے پرانے طور طریقے ترک کرنا ہوں گے ۔ پرامن احتجاج کا حق ہے ، پرامن احتجاج الجہاد، مارو کے نعروں سے ہوتا ہے ؟ کہاں پرامن احتجاج کیا جاتا ہے ؟ جہاں آپ آنسو گیس لے کر چلیں، کہاں پرامن احتجاج کیا جاتا ہے جہاں مارو یا مر جانے کا نعرہ لگا کر چلیں؟۔اس بار احتجاج کی کوئی درخواست نہیں دی گئی، کوئی اجازت نہیں مانگی گئی، ہم نے مذاکرات کے کبھی دروازے بند نہیں کئے ، ہم چاہتے ہیں بات ہو، ہم بات چیت کیلئے تیار ہیں۔ جیلوں میں لاکھوں قیدی پڑے ہیں، حکومت کچھ قیدیوں کو کیسے چھوڑ دے ،آئین اور قانون کو ایک سائڈ پر رکھ کر کیسے جیلوں کے دروازے کھول دیں ۔سول نافرمانی کی تلوار ہماری گردنوں میں لٹکا کر مذکرات کی طرف نہ آئیں ،یہ کہیں کہ اب وہ ہر جگہ سے بے بس اور لاچار ہوگئے ہیں تو مذکرات کریں شرائط کے ساتھ مذاکرات کی بات نہیں ہوگی۔