پیانگ یانگ(نیٹ نیوز)شمالی کوریا میں فوجی پریڈ کے دوران دنیا کے سب سے طاقتوربیلسٹک آبدوزمیزائل کی نمائش کی گئی ۔میزائل اپ گریڈ ورژن ہے جس پر Pukguksong-5 کا لیبل درج ہے ،شمالی کوریا کے سربراہ کم جونگ ان نے بھی پریڈ میں شرکت کی میزائل کی رونمائی پر اظہار مسرت کیا ،تفصیلات کے مطابق شمالی کوریا نے اپنے نئے بیلسٹک میزائل کی رونمائی کی ہے جسے وہ دنیا کا سب سے طاقتور ہتھیار قرار دے رہا ہے ،غیر ملکی میڈیا کے مطابق شمالی کوریا میں گزشتہ رات ایک پریڈ کا انعقاد کیا گیا جس میں اس نے سب میرین سے داغے جانے والے اپنے نئے بیلسٹک میزائل کی رونمائی کی۔ میڈیا رپورٹس میں کہا گیا ہے کہ شمالی کوریا کے سربراہ کِم جونگ ان نے چند روز قبل اپنی اقتصادی پالیسیوں میں ناکامی کا اعتراف کیا لیکن وہ ملک کی فوجی قوت میں برتری کے لیے پھر بھی پرعزم ہیں، پریڈ میں شمالی کوریا کے سربراہ کِم جونگ نے بھی شرکت کی اور وہ میزائل کی رونمائی کے موقع پر انتہائی خوش دکھائی دیئے۔ ،شمالی کوریا کے مقامی میڈیا کا میزائل کے حوالے سے کہنا ہے کہ دنیا کے سب سے طاقتور ہتھیار سب میرین لاؤنچ بیلسٹک میزائل کا شمالی کوریا کے ہتھیاروں میں شامل ہونا فوجی قوت میں انتہائی طاقتور اضافے کا مظاہرہ ہے ۔شمالی کوریا کے مقامی میڈیا کی جانب سے جاری کی گئی میزائل کی تصویر میں دیکھا گیا ہے کہ میزائل پر Pukguksong-5 کا لیبل لگا ہوا ہے جو گزشتہ برس اکتوبر میں شمالی کوریا کی ایک بڑی فوجی پریڈ میں متعارف کرائے گئے Pukguksong-4 کا ایک اپ گریڈ ورژن ہے ۔ بین الاقوامی برادری کے لیے پیانگ یانگ کا جوہری و بیلسٹک میزائل پروگرام باعث فکر ہے اور اس پر مذاکراتی عمل گزشتہ چند برسوں سے معطل ہے ۔