لاہور(وقائع نگار،92نیوزرپورٹ) وزیراعلیٰ پنجاب سردار عثمان بزدارنے کہا ہے کہ نیا بلدیاتی نظام مثالی ہوگا اور نچلی سطح سے ترقی کا نیا دور شروع ہوگا۔ نچلی سطح پر عوام کے مسائل کے حل کے لئے اقدامات کا جائزہ اجلاس کی صدارت کرتے ہوئے وزیراعلیٰ نے کہا کہ بلدیات سے ترقی کا ثمر لوگوں کی دہلیز تک پہنچے گا۔ایکٹ کے ذریعے عوام کونچلی سطح پر حقیقی نمائندگی میسر ہو گی۔ بلدیاتی اداروں کو مضبوط بنانے کے لئے مثالی سسٹم لانا چاہتے ہیں ۔عوام کے حقیقی مسائل کو حل کرنے کے لئے ہر ضلع کیلئے الگ ترقیاتی پیکیج دیا جائے گا اورپینے کے صاف پانی کی فراہمی اور سینی ٹیشن کی بہترین سہولیات ترجیحات میں سرفہرست ہے ۔وزیراعلی عثمان بزدار نے کہا کہ سڑکوں اور گلیوں کی تعمیر و مرمت پر توجہ دی جارہی ہے ۔ حکومت نچلی سطح پر اختیارات کی منتقلی پر یقین رکھتی ہے ۔بعدازاں وزیراعلیٰ سے صوبائی وزیر صحت ڈاکٹر یاسمین راشد نے ملاقات کی جس میں کورونا کی دوسری لہر سے نمٹنے کے لئے کئے گئے اقدامات پر تبادلہ خیال کیا گیا۔ وزیراعلیٰ نے ایس او پیز پر موثر انداز میں عملدرآمد کی ہدایت کرتے ہوئے کہا کہ حکومت اپنی ذمہ داری نبھا رہی ہے ، شہریوں کو بھی احتیاط کا دامن ہاتھ سے نہیں چھوڑنا چاہیئے ۔کورونا کے خلاف جنگ صبر وتحمل اور دور اندیشی سے لڑ رہے ہیں۔زندہ قومیں آزمائش میں ہی بہتر راستے نکالتی ہیں ۔ پی ڈی ایم کا ایجنڈا ترقی کے سفر میں رخنہ ڈالنا ہے ۔منفی سیاست کا جواب عوام کی خدمت سے دیں گے ۔علاوہ ازیں وزیراعلیٰ نے پروٹوکو ل آفیسر مبشر جاوید کے والد کے انتقال پر گہرے دکھ اور افسوس کا اظہار کیا اور سوگوار خاندان سے دلی ہمدردی و اظہار تعزیت کیا۔