کراچی(سٹاف رپورٹر، این این آئی)وزیراعلیٰ سندھ کا طیارہ کس نے استعمال کیا؟ ملتان میں ہنگامی لینڈنگ کرنے والے وزیر اعلیٰ کے سرکاری طیارے میں بلال زرداری کے ساتھ کون سوار تھے ، اپوزیشن لیڈر سندھ اسمبلی حلیم عادل شیخ نے ایئرپورٹ انتظامیہ کو خط لکھ دیا، خط سیکرٹری ایوی ایشن ڈویژن ،ڈائریکٹر جنرل ہیڈکوارٹرز سول ایوی ایشن اتھارٹی، ڈائریکٹر جنرل ایئرپورٹ سکیورٹی فورس کے نام پر لکھا گیا،خط کی کاپی وزیراعظم اور گورنر سندھ کے پرنسپل سیکرٹری کو بھی ارسال کی گئی، حلیم عادل شیخ نے خط میں لکھا ہے جہاز میں کون لوگ سوار تھے تفصیلات دی جائیں، سندھ میں منتخب وغیرمنتخب افراد سیاسی پروگراموں میں سرکاری فنڈ کا استعمال کررہے ہیں، چیف سیکرٹری سندھ عوام کو بتائیں کس قانون کے تحت وزیر اعلیٰ کا سرکاری طیارہ کسی سیاسی شخصیت کو استعمال کرنے دیا گیا۔ دوسری جانب حلیم عادل شیخ نے اپنے بیان میں کہا کہ تھر میں غریب پر امن احتجاج کرنے والے مزدوروں کو تشدد کا نشا نہ بنایا جارہا ،جس کی مذمت کرتے ہیں۔