کراچی ، مستونگ(مانیٹرنگ ڈیسک، نامہ نگار ) پیپلز پارٹی کے چیئر مین بلاول بھٹو زرداری نے ٹویٹ میں کہا ہے کہ میں نے پی ٹی آئی کی ناکامیوں پر ایک پریس کانفرنس کی۔مسئلہ کشمیر، معیشت اور کورونا سے متعلق تحریک انصاف کی نااہلیوں کو اجاگر کیا۔پی ٹی آئی کی کرپشن کے معاملے کو بھی اجاگر کیا۔عمران خان کو چیلنج کیا تھا کہ وہ قومی اسمبلی یا ٹی وی پر مناظرہ کرلیں۔چیلنج کیا تھا کہ این آئی سی وی ڈی طرز کا ا یک ہسپتال پورے پاکستان میں دکھا دیں۔چیلنج کیا تھا کہ خیبر پختونخوا اور پنجاب میں فی کس ٹیسٹنگ کا موازنہ سندھ سے کرا دیں۔عمران خان نے ابھی تک میرے کسی بھی چیلنج کو قبول نہیں کیا۔ جبکہ پیپلز پارٹی کے بانی رہنما مرحوم ڈاکٹر آیت اللہ درانی کے بڑے صاحبزادوں سعید احمد درانی، نوید احمد درانی کو فون کر کے ڈاکٹر آیت اللہ درانی کی وفات پر تعزیت کا اظہار کرتے ہوئے بلاول بھٹو نے کہا کہ مرحوم ڈاکٹر آیت اللہ درانی پیپلز پارٹی کے بانی رہنمائوں میں شمار ہوتے تھے ۔