لاہور (سپورٹس رپورٹر)قومی کرکٹر کاشف بھٹی کو کورونا وائرس ٹیسٹ منفی آنے پر پاکستان سکواڈ جوائن کرنے کی اجازت دے دی گئی ہے ۔ کرکٹر کاشف بھٹی عمران خان سینئر، حیدر علی اور مساجر ملنگ علی کے ساتھ 8 جون کو دو کووڈ 19 ٹیسٹ منفی آنے کے بعد انگلینڈ گئے تھے جہاں کرکٹرز کی کووڈ 19 ٹیسٹنگ ہوئی اور اس دوران کرکٹر کاشف بھٹی کا کووڈ 19 ٹیسٹ انفیکشن کی باقیات کے سبب مثبت آگیا جس کے باعث انہیں دیگر اسکواڈ سے الگ کر دیا گیا۔انگلینڈ اینڈ ویلز کرکٹ بورڈ کے ترجمان کا کہنا ہے کہ ایک پاکستانی کھلاڑی کو اسکواڈ میں شمولیت کی اجازت دے دی گئی ہے ، کھلاڑی کو احتیاطی طور پر سیلف آئسولیشن کی مدت پوری کرنے پر اسکواڈ جوائن کرنے کی اجازت دی گئی۔ترجمان کے مطابق کھلاڑی کا اب دوسرا ٹیسٹ منفی آ چکا ہے ، کھلاڑی اب اسکواڈ کے دوسرے اراکین کے لیے خطرہ نہیں ہے ۔ای سی بی ترجمان کے مطابق پہلی انفیکشن کی باقیات کے سبب کھلاڑی کا ایک ٹیسٹ مثبت آیا تھا، پبلک ہیلتھ اور ایک وائرالوجسٹ کی ہدایت پر کھلاڑی کو سیلف آئسولیشن میں رکھا گیا تھا۔کاشف بھٹی کے کووڈ 19 ٹیسٹ کی خبریں سامنے آنے کے بعد پی سی بی نے کہا کہ کاشف بھٹی کا معاملہ ای سی بی کے دائرہ اختیار میں آتا ہے ، کاشف بھٹی کو دوٹیست منفی آنے کے بعد انگلینڈ بھیجا گیا تھا، ان کا ائیر لائن کے لئے کرایا جانے والا ٹیسٹ بھی منفی آیا تھا۔پی سی بی حکام کا کہنا ہے کہ سیریز کے پروٹوکول کے مطابق انگلینڈ کے بائیو سیکیور ماحول کے تمام تر انتظامات کا دائرہ اختیار ای سی بی کا ہے ۔